Thursday, October 3, 2019

രക്തരൂക്ഷിതമായ ശുദ്ധീകരണം


പരിശുദ്ധ അമ്മ പറയുന്നു:

ഇന്ന്‌ നിങ്ങൾ രക്തരൂക്ഷിതമായ, വേദനാജനകമായ പോരാട്ടത്തിലേക്ക്‌ നടന്നടുത്തു കൊണ്ടിരിക്കുകയാണ്‌. യേശുവിൻ്റെ രണ്ടാം വരവിനും ഭരണത്തിനും മുന്നോടിയായി എൻ്റെ വിമലഹൃദയത്തിൻ്റെ വിജയത്തിനു മുമ്പ്‌, ഈ കാലഘട്ടത്തിൽ ഈ പോരാട്ടം അരങ്ങേറേണ്ടതുണ്ട്‌.
1917 ൽ ഫാത്തിമയിൽ വച്ച്‌ പ്രവചനാത്മകമായി ഞാനിതു വെളിപ്പെടുത്തിയിരുന്നു. സൂര്യനെ ഉടയാടയായി ധരിച്ചിരിക്കുന്ന സ്ത്രീയും ചുവന്ന സർപ്പവും തമ്മിലുളള, നൂറ്റാണ്ടു മുഴുവൻ നീണ്ടു നിൽക്കുന്ന യുദ്ധം വ്യക്തമായ ഈ നിമിഷങ്ങളിൽ, സഭയെ മുഴുവനായി നശിപ്പിക്കാൻ ശ്രമിച്ചുകൊണ്ട് ലോകമെമ്പാടും പരക്കുന്ന നാസ്തികത്വം വഴി ദൈവത്തെ അഹന്തയോടെ വെല്ലുവിളിക്കുന്നത് ഞാൻ മുൻകൂട്ടി കാണുകയായിരുന്നു. 

(പരിശുദ്ധ അമ്മ ഫാ.സ്റ്റെഫാനോ ഗോബിക്കു നൽകിയ സന്ദേശങ്ങളിൽ നിന്ന്‌)


Monday, September 30, 2019

നന്മ വിജയിക്കും

പരിശുദ്ധ അമ്മ സംസാരിക്കുന്നു:


"ലോകത്തിലും സഭയിലും താണിറങ്ങുന്ന കൂരിരുട്ട്‌ എത്രത്തോളം കടുത്തതായിരിക്കുമോ അത്രത്തോളം സുസ്പഷ്ടമായിരിക്കും നിങ്ങൾക്കു വഴി കാട്ടുവാൻ വേണ്ടി എൻ്റെ ഹൃദയത്തിൽ നിന്നു നിർഗമിക്കുന്ന പ്രകാശം.
ഈ പ്രകാശത്തിൽ നടക്കുക. തൽഫലമായി നിങ്ങൾ എപ്പോഴും പ്രകാശത്താൽ നിറയപ്പെടും.
പിശാച്‌ സഭയിൽ നുഴഞ്ഞു കയറിയിട്ടുണ്ട്‌; ഇതു സത്യമാണ്‌. ഓരോ ദിവസവും അവൻ ഇരകളെ അജപാലകരുടെ ഇടയിൽ നിന്നു പോലും കൊയ്തെടുക്കുന്നു.
പാവപ്പെട്ട എൻ്റെ ഈ സഭ! നീ രോഗിണിയായും മരണാസന്നയായും കാണപ്പെടുന്നു!
എങ്കിലും ഗുരുതരമായ നിൻ്റെ ഈ രോഗം - നിൻ്റെ മേൽ ശത്രു കൈവരിച്ചുവെന്നു തോന്നിക്കുന്ന ഈ വിജയം - മരണത്തിനുളളതല്ല. അതു ദൈവത്തിൻ്റെ ഉപരിമഹിമയ്ക്കു വേണ്ടിയുളളതത്രേ.

Sunday, September 29, 2019

അത്യുന്നത ദൈവദൂതന്മാരുടെ സമയം

സെപ്തംബർ 29 - ഇന്ന്‌ മുഖ്യദൂതന്മാരായ വി.മിഖായേൽ, വി.ഗബ്രിയേൽ, വി.റഫായേൽ എന്നിവരുടെ തിരുനാൾ
(പരിശുദ്ധ അമ്മയുടെ സന്ദേശം)



"ഇപ്പോൾ നടന്നുകൊണ്ടിരിക്കുന്ന അതിരൂക്ഷമായ യുദ്ധം ഉന്നതാരൂപികളുടെ തലത്തിലുളളതാണ്‌. മാലാഖമാരും ദുഷ്ടാരൂപികളും തമ്മിലുളള യുദ്ധം, സ്വർഗവും ഭൂമിയും തമ്മിലും മാലാഖമാരും പിശാചുക്കളും തമ്മിലുമുളള യുദ്ധം. അതിദൂതനായ വി.മിഖായേലും ലൂസിഫറും തമ്മിലുളള  ഘോരസമരത്തിലാണ്‌ നിങ്ങൾ ഉൾപ്പെട്ടിരിക്കുന്നത്‌. നിങ്ങളുടെ ആത്മാക്കളെയും സഭയുടെ നിലനിൽപ്പിനെയും മാനവവംശത്തിൻ്റെ നന്മയെയും ഈ മാലാഖമാരെ കർത്താവ്‌ ഭരമേൽപ്പിച്ചിരിക്കുന്നു.
വിനാശകരമായ ഈ കാലഘട്ടത്തിൽ കർത്താവിൻ്റെ ദൂതന്മാരോട്‌ നിങ്ങൾ വളരെയേറെ പ്രാർത്ഥിക്കേണ്ടതുണ്ട്‌.
അത്യുന്നത ശക്തികളായ ദൈവദൂതന്മാരുടെ സമയമാണിത്‌. സാത്താൻ്റെ അവസാന പരാജയത്തിനു വേണ്ടിയുളള നിർണ്ണായകമായ യുദ്ധത്തിലും ക്രിസ്തുവിൻ്റെ മഹത്വമേറിയ രാജവാഴ്ചയുടെ ആവിർഭാവത്തിലും എൻ്റെ വിമലഹൃദയത്തിൻ്റെ ഈ ഭൂമിയിലെ വിജയത്തിലും എൻ്റെ എല്ലാ മക്കളെയും നയിക്കുന്നത്‌ ഈ ഉന്നതശക്തികളായ മാലാഖമാരാണ്‌.."

Saturday, September 28, 2019

വിശ്വാസം സംരക്ഷിക്കുക


(പരിശുദ്ധ അമ്മ ഫാ.സ്റ്റെഫാനോ ഗോബിയിലൂടെ നൽകിയ സന്ദേശം)

"യഥാർത്ഥ വിശ്വാസത്തിൽ നിന്നും അകന്ന്‌ അപകടസാദ്ധ്യതയിലേക്ക്‌ എൻ്റെ കുഞ്ഞുമക്കൾ വഴുതിപ്പോകുന്ന സമയമാണിത്‌. സന്യസ്തരുടെ ഇടയിൽപ്പോലും തെറ്റുകൾ പ്രചരിക്കപ്പെടുന്നു. അവ ശ്രദ്ധിക്കപ്പെടുകയും അനുധാവനം ചെയ്യപ്പെടുകയും ചെയ്യുന്നു. അവ പത്രങ്ങളിലും മറ്റും നിമിഷങ്ങൾക്കുളളിൽ വ്യാപകമായി പ്രസിദ്ധീകരിക്കപ്പെടുന്നു. വിശ്വാസ സത്യങ്ങൾ അതിൻ്റെ വ്യക്തതയിലും പൂർണതയിലും പ്രചരിപ്പിക്കുവാൻ സഹായിക്കുന്ന മാദ്ധ്യമങ്ങൾ ഇക്കാലഘട്ടത്തിൻ്റെ വലിയ ആവശ്യമാണ്‌.
അതുകൊണ്ട്‌ പ്രാർത്ഥനയോടെ, ജാഗരൂകതയോടെ, ശക്തമായ വിശ്വാസത്തോടെ  തിരുസഭാപഠനങ്ങൾക്ക്‌ ചെവി പാർത്തിരിക്കുക എന്നതും ഇന്നിൻ്റെ ഒരാവശ്യമാണ്‌. മാർപ്പാപ്പായുടെ പഠനങ്ങളെ ശ്രദ്ധിക്കുവാനും നിങ്ങളുടെ കത്തോലിക്കാ വിശ്വാസത്തിൻ്റെ കേന്ദ്രബിന്ദുവായ വിശ്വാസപ്രമാണം ഏറ്റുചൊല്ലുവാനും പോൾ ആറാമൻ പാപ്പായാൽ വിരചിതമായ വിശ്വാസസംഹിതയെക്കുറിച്ച്‌ ധ്യാനിക്കുവാനും ഞാൻ നിങ്ങളോട്‌ ആവശ്യപ്പെടുകയാണ്‌. ദൈവവചനം വിശ്വസിച്ച്‌, പാലിച്ച്‌, സ്നേഹിച്ച്‌, ജീവിച്ച്‌ നിങ്ങൾക്കു മാതൃകയായ നിങ്ങളുടെ അമ്മയുടെ യഥാർത്ഥ വിശ്വാസത്തിൽ നിങ്ങൾ ആയിരിക്കുവിൻ.."

Tuesday, September 24, 2019

വെളിപാടിലെ കന്യക



        "സ്വർഗ്ഗത്തിൽ വലിയ ഒരു അടയാളം കാണപ്പെട്ടു. സൂര്യനെ ഉടയാടയാക്കിയ ഒരു സ്ത്രീ. അവളുടെ പാദങ്ങൾക്കടിയിൽ ചന്ദ്രൻ; ശിരസ്സിൽ പന്ത്രണ്ടു നക്ഷത്രങ്ങൾ കൊണ്ടുളള കിരീടം.. അവൾ ഗർഭിണിയായിരുന്നു. പ്രസവവേദനയാൽ അവൾ നിലവിളിച്ചു. പ്രസവക്ലേശത്താൽ അവൾ ഞെരുങ്ങി. സ്വർഗത്തിൽ മറ്റൊരു അടയാളം കൂടി കാണപ്പെട്ടു. ഇതാ, അഗ്നിമയനായ ഒരുഗ്ര സർപ്പം, അതിന് ഏഴു തലയും പത്തു കൊമ്പും."
( വെളിപാട് 12:1-3)

1980 ഏപ്രിലിൽ പരിശുദ്ധ അമ്മ ഫാ.സ്റ്റെഫാനോ ഗോബിയിലൂടെ ഇപ്രകാരം പറഞ്ഞു: "ഞാൻ വെളിപാടിലെ കന്യകയാണ്‌. വിശുദ്ധ ലിഖിതങ്ങളെ പൂർണമായി ഞാൻ മനസ്സിലാക്കിത്തരാം. വിശിഷ്യാ, അതിൻ്റെ അവസാനത്തെ പുസ്തകം - നിങ്ങൾ ജീവിക്കുന്ന ആ പുസ്തകം - നിങ്ങളെ വായിച്ചു ഗ്രഹിപ്പിക്കാം.  എൻ്റെ മഹാവിജയം അതിൽ പ്രവചിച്ചിട്ടുണ്ട്‌."


      "സൂര്യനെ വസ്ത്രമായി അണിഞ്ഞ സ്ത്രീയും അവളുടെ സൈന്യവും, ചുവന്ന സർപ്പം നേതൃത്വം കൊടുക്കുന്ന സൈനികർക്കെതിരെ പരസ്യമായി യുദ്ധത്തിലേർപ്പെട്ടിരിക്കുകയാണ്‌. കടലിൽ നിന്നു വന്ന കറുത്ത മൃഗം സർപ്പത്തിൻ്റെ സേവനത്തിൽ ഏർപ്പെട്ടിരിക്കുന്നു..
     ചുവന്ന സർപ്പം മാർക്സിസ്റ്റ്‌ നിരീശ്വരത്വമാണ്‌. അത് ഇപ്പോൾ ലോകം മുഴുവനും കീഴടക്കുകയും ദൈവത്തെക്കൂടാതെയുളള അതിൻ്റെ സംസ്കാരം കെട്ടിപ്പടുക്കുന്നതിന് മനുഷ്യവർഗ്ഗത്തെ പ്രേരിപ്പിക്കുകയും ചെയ്യുന്നു. തൽഫലമായി ലോകം വിദ്വേഷത്തിൻ്റെ തണുപ്പിലും പാപത്തിൻ്റെയും അശുദ്ധിയുടെയും അന്ധകാരത്തിലും മുങ്ങിപ്പോയിരിക്കുന്നു..
    കറുത്ത മൃഗം മേസണറി (free Masons) പ്രസ്ഥാനമാണ്‌. അത് സഭയിൽ നുഴഞ്ഞു കയറി അതിനെ ആക്രമിക്കുകയും മുറിവേൽപ്പിക്കുകയും നിഗൂഢ വക്രതയാൽ അതിനെ നശിപ്പിക്കാൻ ശ്രമിക്കുകയും ചെയ്യുന്നു. 
       സർപ്പം അതിൻ്റെ ശക്തിയുടെ വൻബലം പ്രകടമാക്കുമ്പോൾ കറുത്ത മൃഗം നിഴലിൻ്റെ മറവിൽ നിഗൂഢമായി കഴിഞ്ഞു കൊണ്ടും രഹസ്യമായി എല്ലായിടത്തും നുഴഞ്ഞു കയറിക്കൊണ്ടും മുന്നേറുന്നു..  
  ഈ അവസാന നാളുകളിലെ അപ്പസ്തോലന്മാരേ, നിങ്ങളുടെ സ്വർഗീയ മാതാവിൻ്റെ നേതൃത്വത്തിൻ കീഴിൽ നിങ്ങൾ സധൈര്യം യുദ്ധം ചെയ്യേണ്ട സമയമായി. 
    പ്രാർത്ഥിക്കുക, സ്നേഹിക്കുക, പ്രായശ്ചിത്തം ചെയ്യുക! നിങ്ങളെ സ്നേഹിക്കുകയും നയിക്കുകയും ചെയ്യുന്ന യേശുവിനെ അനുഗമിക്കുക..."

Monday, September 23, 2019

കാലത്തിൻ്റെ അടയാളങ്ങൾ





                   വി.മത്തായിയുടെ സുവിശേഷം 24:7 ൽ  നാം ഇങ്ങനെ വായിക്കുന്നു: "ക്ഷാമങ്ങളും ഭൂകമ്പങ്ങളും പല സ്ഥലങ്ങളിലും ഉണ്ടാകും. ഇതെല്ലാം ഈറ്റുനോവിൻ്റെ ആരംഭം മാത്രം."  
 ലോകം മുഴുവനിലും വ്യാപകമായി സംഭവിച്ചു കൊണ്ടിരിക്കുന്ന പ്രകൃതി ദുരന്തങ്ങൾ സാധാരണ സംഭവങ്ങളായി തളളിക്കളയാവുന്നവയല്ല. മറിച്ച്, ഗൗരവതരങ്ങളായ ഭാവി സംഭവങ്ങളുടെ മുന്നറിയിപ്പുകളാണ് അവ. 
     ഫാ. സ്റ്റെഫാനോ ഗോബിയിലൂടെ പരിശുദ്ധ അമ്മ നൽകിയ സന്ദേശങ്ങൾ ഇത്തരുണത്തിൽ സ്മരണീയമാണ്‌. മാതാവ് പറയുന്നു: "നിങ്ങൾ ജീവിക്കുന്ന കാലഘട്ടത്തിൻ്റെ ചുവരെഴുത്തുകൾ മനസ്സിലാക്കി ജീവിക്കുവാൻ വേണ്ടി , വിശുദ്ധ ഗ്രന്ഥം എങ്ങിനെയാണ്‌ വായിക്കുകയും ധ്യാനിക്കുകയും ചെയ്യേണ്ടതെന്ന്‌ നിങ്ങൾ മനസ്സിലാക്കുവിൻ."
      ജോൺ മാർട്ടിനസ്‌ എന്ന ദർശകനിലൂടെ വീണ്ടും മാതാവ്‌ 2018 ജൂലൈ മാസത്തിൽ സന്ദേശം നൽകി: "ദൈവനീതി നടപ്പിലാകുന്നതാണ് നിങ്ങളിപ്പോൾ കണ്ടു കൊണ്ടിരിക്കുന്നത്‌.  വി.മത്തായിയുടെ സുവിശേഷത്തിൽ പറഞ്ഞിരിക്കുന്ന, ഈറ്റുനോവിൻ്റെ നടുവിലാണ് ലോകമിപ്പോൾ.  കാലാവസ്ഥയിൽ വന്നു കൊണ്ടിരിക്കുന്ന മാറ്റങ്ങളും നിത്യസംഭവങ്ങളാകുന്ന പ്രകൃതിദുരന്തങ്ങളുമെല്ലാം അതാണ് സൂചിപ്പിക്കുന്നത്‌.  
     ദൈവം സ്നേഹമാണ്‌: എന്നാൽ ദൈവം നീതിയുമാണ്‌. അവിടുന്ന്‌ മനുഷ്യനെ ശിക്ഷിക്കുന്നില്ല.  സാത്താൻ്റെ പൈശാചിക സ്വാധീനത്താൽ മാനവരാശി അന്ധരാക്കപ്പെട്ട്‌, ദൈവത്തെ പരിഹസിച്ചു കൊണ്ട് ജീവിതം നയിക്കുകയാണ്‌. 
             വിശുദ്ധ ഗ്രന്ഥത്തിൽ പറഞ്ഞിരിക്കുന്ന  വിശ്വാസത്യാഗത്തിൻ്റെ  സമയം വന്നുകഴിഞ്ഞു!  യുദ്ധം ആസന്നമാണ്‌; ഭൗതിക തലത്തിൽ മാത്രമല്ല,  ആത്മീയ തലത്തിലും..
       തിന്മയും അന്ധകാരവും കൊടി കുത്തി വാഴുന്ന ഈ കാലങ്ങളിൽ, പ്രാർത്ഥനയും ഉപവാസവും ഞാൻ നിങ്ങളിൽ നിന്ന്‌ ആവശ്യപ്പെടുകയാണ്‌.."
   2 തിമോത്തി 3:1-5 ൽ വി.പൗലോസ് ശ്ലീഹായും മുന്നറിയിപ്പു നൽകുന്നു: "ഒരു കാര്യം മനസ്സിലാക്കിക്കൊളളുക, അവസാന നാളുകളിൽ ക്ലേശപൂർണമായ സമയങ്ങൾ വരും. അപ്പോൾ സ്വാർഥസ്നേഹികളും ധനമോഹികളും അഹങ്കാരികളും ഗർവിഷ്ഠരും ദൈവദൂഷകരും മാതാപിതാക്കന്മാരെ അനുസരിക്കാത്തവരും കൃതഘ്നരും വിശുദ്ധിയില്ലാത്തവരുമായ മനുഷ്യരുണ്ടാകും. അവർ മനുഷ്യത്വമില്ലാത്തവരും ഒന്നിനും വഴങ്ങാത്തവരും അപവാദം പറയുന്നവരും ആത്മനിയന്ത്രണമില്ലാത്തവരും ക്രൂരന്മാരും നന്മയെ വെറുക്കുന്നവരും വഞ്ചകരും എടുത്തുചാട്ടക്കാരും അഹന്തയുളളവരും ദൈവത്തെ സ്നേഹിക്കുന്നതിനു പകരം സുഖഭോഗങ്ങളിൽ ആസക്തിയുളളവരും അയിരിക്കും. അവർ ഭക്തിയുടെ ബാഹ്യരൂപം നിലനിർത്തിക്കൊണ്ട്‌ അതിൻ്റെ ചൈതന്യത്തെ നിഷേധിക്കും.." 
     

Monday, July 29, 2019

പുരോഹിതാത്മാക്കൾക്കായി ഉപവസിച്ചു പ്രാർത്ഥിക്കുക

   ഹംഗറിയിലെ മിസ്സിസ്സ്‌ എലിസബത്ത് സാൻ്റോയ്ക്ക് 28-9-1962 ൽ ഈശോ നൽകിയ സന്ദേശം:     
       
       "ആരെങ്കിലും മരണമടഞ്ഞ ഒരു  പുരോഹിതൻ്റെ ആത്മാവിനു വേണ്ടി ഉപവസിച്ചു പ്രാർത്ഥിച്ചാൽ  മരണത്തിൻ്റെ  എട്ടാം ദിവസം ആ ആത്മാവ്  ശുദ്ധീകരണസ്ഥലത്തു നിന്ന് മോചിതനാകും. ആര് ഈ ഉപവാസമെടുത്താലും ആത്മാവ് മോചിപ്പിക്കപ്പെടും. മരണം പ്രസാദവരാവസ്ഥയിൽ ആയിരിക്കണം. ഉപവാസമെടുക്കുന്ന ആൾ ഒരു നേരം റൊട്ടിയും വെളളവും മാത്രം  ഭക്ഷിച്ചു വേണം ഉപവസിക്കാൻ."

പരിശുദ്ധ അമ്മ: "എൻ്റെ വിമലഹൃദയത്തിലെ സ്നേഹാഗ്നിജ്വാലയെ പ്രതി ആരെങ്കിലും എവിടെയെങ്കിലും മൂന്നു നന്മ നിറഞ്ഞ മറിയമേ എന്ന ജപം ചൊല്ലിയാൽ ഞാൻ ഒരാത്മാവിനെ ശുദ്ധീകരണസ്ഥലത്തു നിന്നു മോചിപ്പിക്കും. മാത്രമല്ല, നവംബർ മാസത്തിൽ ഓരോ നന്മ നിറഞ്ഞ മറിയമേ എന്ന ജപം ചൊല്ലുമ്പോഴും പത്ത് ശുദ്ധീകരാത്മാക്കൾ മോചിതരാകും. എൻ്റെ മാതൃഹൃദയത്തിലെ സ്നേഹാഗ്നിജ്വാലയിൽ നിന്നു  വരുന്ന കൃപയുടെ ഫലം സഹനാത്മാക്കൾ തിരിച്ചറിയുകയും ചെയ്യും."